I d Chilche
«Grosätti, säg, was sölls bedüte,
dass jede Sunntig d Glogge lüte?»
«Sie rüefen allne Mönsche zue:
Chumm hüt i d Chilche, chumm zur Rueh!»
«Was tuet men i der Chilche mache?
Der Hans het gseit, me dörf nid lache!»
«Me tuet dem lieb Gott Lieder singe
und möchte sys Wort i ds Härz la dringe.»
«Grosätti, i chas nid verstah!
Doch weisch, i luege gärn di a,
wenn du bisch i der Chilche gsi,
du luegsch denn geng so fründlech dry!»
«Ja weisch, i bi drum däm begägnet,
wo Chind und alti Lütli sägnet.»
«Bim Heiland bisch du gsi? Jäso!
I wott o einisch z Predig cho!»
Martha Wild